മത(ദ)മഥനം
***************
പ്രദർശനമാണ്
മതങ്ങളുടെ മദോൽസവം!
അതോ മദനോൽസവമോ?

നല്ല പുഷ്ടിയുടെ പകൽവെട്ടം
വിനയാന്വിതം സലാംചെയ്ത്
നിശ്ചലമാകുന്ന കാലത്തിന്റെ  കൊളാഷ്!

ഭ്രാന്തൻ(ഭ്രാന്തി)പ്പൂക്കൾ ചൂടി
മുടിയഴിഞ്ഞാട്ടത്തിന്റെ  കൗതുകം!
ഓരോ പൂവിനും നിറമുണ്ട്
മതത്തിന്റെ  നിറമാണ്
നിറനിരയിലാറാടി മദാലസംകൊണ്ടിളകി
മതവസന്തം! നിറപൂക്കാലം!

അരു(ടി)മച്ചെടികളിലേയ്ക്ക്
ആവാഹിക്കപ്പെടുന്ന
ഇഷ്ടഗന്ധവ്യഞ്ചനസഞ്ചാലനം!
ചന്ദനം, സാമ്പ്രാണി, അത്തറും!
കർപ്പൂരം! കുന്തിരിക്കം!
ശ്വാസമടക്കും വൈവിദ്ധ്യം!

കറുപ്പും പച്ചയും ചെമപ്പും
കാവിയും മഞ്ഞയും വെള്ളയും
പരസ്പരമൊട്ടിയുലയുന്ന സങ്കരങ്ങളും!

സൗന്ദര്യസിദ്ധാന്തങ്ങളെ
തട്ടിയുടച്ചു തിരുത്താനും!

മഹാപ്രദർശനം!
പാതയോരങ്ങളിൽ
ഘോഷം!

നോക്കുകൾ കാഴ്ചകളിലേക്ക്
നാക്കുകൾ വാക്കുകളിലേക്ക്
ഹാലിളകി
വാലിളകി
പുലികളിയേറ്റം മുറുകി
കണ്ടും കേട്ടും
തൊട്ടും മണത്തും
വായിച്ചും ചോദ്യമെറിഞ്ഞും
തലചൊറിഞ്ഞ്
പരുങ്ങിനടക്കുന്നു
ലാത്തിയടിയും കണ്ണീർവാതകവും!

പൊടുന്നനെ
വാലിൽ തീപിടിക്കുന്ന ഭ്രാന്ത്
കൂട്ടത്തോടെ തുണിയുരിച്ചെറിയുന്നു
പ്രദർശനത്തെരുവിലെ പുകമറയിൽ
മനസ്സിടുക്കുകളിലെ വൈകൃതങ്ങൾ
തട്ടിയും മുട്ടിയും വെട്ടിപ്പിടിച്ചും
തപ്പിത്തടയുന്നു...

ചെമപ്പുപുഴ
ക്ലൈമാക്സ് വരയ്ക്കുന്നു

മൗനകാഹളം ചങ്ങലയിലിട്ടു
അടുത്ത പ്രദർശനത്തിന്റെ 
തിഥിസ്ഥലിൾക്ക്

ശംഖൂതുന്നു!

Comments

  1. അഭിനവ ഭാരതത്തിന്റെ നേർചിത്രം...

    ReplyDelete
    Replies
    1. മനുഷ്യരുടെ ഓര്മകളില്‍ നിന്ന് തന്നെ മതം മാഞ്ഞുപോയെങ്കില്‍....

      Delete
  2. അതെ ...
    ഭാരത്തിൽ ഇന്ന് നടമാടുന്നത് മത വസന്തമാണ് ...!
    ഭ്രാന്തൻ(ഭ്രാന്തി)പ്പൂക്കൾ ചൂടി
    മുടിയഴിഞ്ഞാട്ടത്തിന്റെ കൗതുകം!
    ഓരോ പൂവിനും നിറമുണ്ട്
    മതത്തിന്റെ നിറമാണ്
    നിറനിരയിലാറാടി മദാലസംകൊണ്ടിളകി
    മതവസന്തം! നിറപൂക്കാലം!

    ReplyDelete
    Replies
    1. മാറണമല്ലോ ഇതൊക്കെ. നമ്മള്‍ ഓരോരുത്തരും വിചാരിച്ചാല്‍ മാറ്റിയെടുക്കാവുന്നതെയുള്ളല്ലോ.

      Delete
  3. സത്യം. ഇപ്പോൾ നടക്കുന്നത് ഇത് തന്നെ

    ReplyDelete
  4. സമൂഹം ഒരു മാറ്റത്തിനായ് ഒരുങ്ങേണ്ടതുണ്ട്

    ReplyDelete

Post a Comment

Popular posts from this blog