ജലസുന്ദരീ...
****************
-
നീലിമകുടിച്ച ലഹരിയിൽ
നിന്നെയൊന്നു തൊടാനാഞ്ഞ
ഒരു തുമ്പുസ്പർശത്തിലലയിളക്കി
ചിരിച്ചുകുണുങ്ങിയെന്നെ
വാ .... വാ... എന്ന്
മാടിവിളിച്ചതിലേക്ക്
എന്റെ പ്രണയമിറങ്ങി വന്ന നാളുകളിൽ
സുന്ദരിയായിരുന്നു നീ

പാദമിറങ്ങി
മുട്ടോളം
അരയോളം
പിന്നെപ്പിന്നെയെന്റെ
കുളിർമുത്തങ്ങളിലുടഞ്ഞ്
നീയെന്നെപ്പുണർന്ന വ്യാപ്തിയിൽ
തിളച്ചുനിന്ന നിന്നിലേക്ക്
മുങ്ങിയിറങ്ങിയുരുമ്മി
നീന്തിത്തുടിക്കും നേരം
ജലകന്യേ
നീയതിമനോഹരിതന്നെയായിരുന്നു...
സ്വച്ഛമായ അഗാധനീലിമപോലെ
എന്റെയുള്ളകം
നിറം നിറച്ച
മുഗ്ദ്ധശാന്തിനി

ദാഹമെന്നിൽ മൂർച്ഛിച്ചതോ
മോഹഭ്രമത്താൽ നിന്നെയുരിഞ്ഞതോ
കാമലോഭത്താൽ മുകർന്നതോ
ഊർന്നിറങ്ങിയ നിന്റെയടിവയറ്റിലെ
ചരൽപ്പരലുകളെയെണ്ണിയെണ്ണി
നീ വരണ്ടുചാകുമ്പോൾ
തേഞ്ഞൊടിഞ്ഞ മുലക്കാമ്പുകൾ
ചെത്തിക്കോരിയെടുത്തതോ
ശോഷിച്ച നിന്റെ
മേനിവിതാനങ്ങളിൽ
നഖദംഷ്ട്രകൾ
വെറിവരകൾ കോറിയെന്നതോ

നീരാവിയായി നിന്റെയശ്രുക്കൾ
പൊങ്ങിയുയർന്നതെന്തേ
കനത്തശാസനക്കോ
ശിക്ഷാവിധിയെഴുത്തോ
കറുപ്പിട്ട്
മേഘനീതിയായ് കനച്ചത് ?
കൊക്കിക്കുരച്ചുള്ള ചാട്ടം
ജലമുടിക്കെട്ടഴിച്ചു നിന്റെ
ചടുലനർത്തനം
വെള്ളിടിവാൾ വീശി
ഗർജ്ജിച്ച താണ്ഡവം

ചോരപ്പുഴയാർത്ത്
പ്രളയച്ചിരിയലച്ച്
നിന്റെയാഴത്തിലേക്കെന്നെ
വന്നേ... വന്നേ ...
വലിച്ചിറക്കുന്ന
രുദ്രരൂപിണീ
നീയൊരു ജലഭദ്രകാളി...

Comments

Post a Comment

Popular posts from this blog

ഇഷ്ടം സ്നേഹം കൊളുത്തി മനസ്സുകളുരുക്കി വിളക്കിയെടുത്ത് ശരി തെറ്റുകൾ എന്റേത് നിന്റേതെന്ന് കലഹിക്കാതിരിക്കുന്നിടത്ത് പൊങ്ങച്ചങ്ങൾ ഹൃദയച്ചെപ്പിൽ അടഞ്ഞമരുമ്പോൾ ധാരണകൾ സമാന്തരങ്ങളിൽ ഒഴുകിയെങ്കിൽ അവിടെയെന്റെ 'ഇഷ്ട'ത്തിന്നിടമുണ്ട്.
Read more
പലായനം ************** ·         ഗീത മുന്നൂര്ക്കോട് -- ഭ്രാന്താണെന്ന് ഭ്രാന്തിനകം വിശപ്പെന്ന് അകത്ത് പുറത്ത് അകംപുറം നിറയെ വിശപ്പ്! വിശക്കുന്നെന്ന് വിശപ്പിന്റെ ഭ്രാന്ത് അകത്ത് പുറത്ത് അകം പുറം മുഴുത്ത ഭ്രാന്ത്! നരഭോജികളുടെ നാടാണ് വിശപ്പ് വിശേഷപ്പെട്ടതു തന്നെ വിശേഷപ്പെട്ട ഭ്രാന്ത ൻ വിശപ്പ്! അവ ൻ ഭ്രാന്തനെന്നു വിളിക്കപ്പെടുന്ന വെറും മനുഷ്യ ൻ അവനില്ല ഇരുട്ടിലൊളിക്കാ ൻ നാട്ടിടങ്ങ ൾ ഇല്ലാത്ത കറുപ്പിടങ്ങ ൾ തിരയുന്ന അവന്റെ വിശപ്പ്! കാണാമറയത്തേക്കില്ലൊരു ഒളിയിടം ഇല്ലൊയൊരിഞ്ചോലയിടം ഭ്രാന്തിന്‍റെ വിശപ്പിലോ വിശപ്പെന്ന ഭ്രാന്തിലോ കല്ലെറിയപ്പെടും ഒളിച്ചുകടന്നുചെന്ന കാട് കുടുസ്സിടം കണ്ടെത്തിയതൊരു കൂട് കൂട്ടാകാമെന്നു കൊഞ്ചിച്ച് കൂട്ടം കൂടി വിശപ്പണച്ച്... ഇരുട്ടറിയാത്ത ഭ്രാന്ത ൻ കാഴ്ചയിലേക്ക് നരഭോജിക ൾ കുടിയേറുമെന്നും കാത്ത് നാടത്തത്തെ ഭയന്ന് ഭ്രാന്തന്റെ വിശപ്പ്!
Read more
എവിടെ... ? ************** നീ എന്റെ മുറ്റത്ത്   കുടഞ്ഞിട്ടു പോയ പാദസ്വനങ്ങൾ എന്റെ ജനാലക്കഴികളിലേക്ക് തൂകിയിട്ട വളക്കിലുക്കങ്ങൾ എന്റെ പൂമുഖത്തേക്ക് വീശിയെറിഞ്ഞ മുല്ലഗന്ധങ്ങൾ എന്റരികിലേക്ക് വരാം വരാം എന്നു മോഹിപ്പിച്ചിരുന്ന പട്ടുപാവടയുടെ പടപടപ്പുകൾ എല്ലാമെല്ലാം ഞാൻ പെറുക്കി സ്വരൂപിച്ചിരുന്നു... ഹൃദയച്ചെപ്പിലവ   ഒളിപ്പിച്ചിരുന്നു... കാണുന്നില്ലൊന്നും എവിടെയോ കളഞ്ഞുപോയിയെന്ന് ഞാനലയുമ്പോഴും...
Read more