മലയര്ബുദം
--- --- --- ---
പണ്ടുപണ്ടെന്നോ
ഒരു
മൃതസഞ്ജീവനീവാഹകന്
വഴിയൊരുക്കി
കൂനിപ്പോയൊരു *കൂനൻ
അന്ധാളിച്ചനങ്ങാപ്പാറയായ
*അനങ്ങൻ
ഇവരിരുവരുടെ
മടിത്തട്ടുകളിൽ
ആലോലം താലോലം
ഗ്രാമശിശുക്കൾ
കുന്തളിച്ചും
കരണംമറിഞ്ഞും
കുസൃതിക്കൊയ്ത്തിലൊരു
താഴ്വാരം
എന്ന്
എങ്ങനെയോ
എന്തോ
രോഗാണുപോലിഴഞ്ഞെത്തി
ക്വാറിച്ചൊറികളിൽ
ദംഷ്ട്രമുനച്ച്...
മലപാദങ്ങളിലെയാദ്യകൊത്ത്
നഖത്തുമ്പിൽ നിന്നും
നെറുകയിലേക്ക്
വീണ്ടും വീണ്ടും
കൊണ്ട വെട്ടുകളിൽ മുറിഞ്ഞ്
അനങ്ങന്റെ
സിരകളിലേക്ക്
മെല്ലെയരിച്ച്
കൂനന്റെ
കൂനിലേക്ക്
നുഴഞ്ഞേറി
നോവ്...
മഴച്ചാട്ടത്തോടൊപ്പം
മലമിഴിയൊഴുക്കായി
ഒപ്പത്തിനൊപ്പം
അടിവയറ്റിൽ കല്ലുരുമ്മൽ
മനംപിരട്ടിച്ചാട്ടം
ശിലാവർഷം, മൺകലക്കം
“വയ്യേ... വയ്യെ”ന്നാർത്ത്
അർബുദപ്പെരുക്കം
സ്വപ്നപ്പാറയിടിഞ്ഞ്
പച്ചപ്പടർപ്പണഞ്ഞ്
കൂനനു
മെയ്ക്കടച്ചിൽ
അനങ്ങന്നാമവാതം
വേണമിനി
മരുന്നൂട്ട്
കടുപ്പമുറ്റ്
നിയമം പൊതിഞ്ഞ
പ്രതിരോധം
ക്യാപ്സ്യൂൾപ്പാകം.
·
*അനങ്ങൻ മല, *കൂനൻ മല.
·
ഇക്കഴിഞ്ഞ പെരുമഴക്കാലത്ത് അനങ്ങൻ മലയുടെ അടിവാരപ്രദേശങ്ങളിൽ ഉരുൾപ്പൊട്ടൽ മൂലം ഏറെ നാശങ്ങൾ സംഭവിച്ചു.
ക്വാറികളുടെ നിരന്തരമായ പാറയിടിക്കൽ ചുറ്റുമുള്ള
ഗ്രാമങ്ങളിൽ പരിസ്ഥിതിയുടെ അസന്തുലനം
സൃഷ്ടിക്കുന്നു...
Comments
Post a Comment