കൊക്കരക്കോ
***************
--- ഗീത മുന്നൂര്ക്കോട് ---
നിരാസത്തിന്റെ ഒന്നാം
പടിയിലേക്ക്
ആദ്യചുവട്
ചുരുണ്ടൊതുങ്ങാനൊരു കട്ടിപ്പുതപ്പിലേക്ക്
നിലയുറപ്പിച്ച്
പക്ഷേ...
അവിശ്വാസം
ചെറുഡോസുകളിൽപ്പൊതിഞ്ഞ്
ക്യാപ്സ്യൂൾപ്പരുവം വിഴുങ്ങി
സിരകളിലുടക്കുന്ന രാസം
സഹനത്തിന്റെ തീപ്പടർപ്പിൽ
പൊള്ളിക്കരിയുന്ന
കുഞ്ഞിക്കുമ്പിളുകളിലേക്ക്
യാചനകളിലേക്ക്
കനൽത്തുള്ളികളുടെ
കൊടും പെയ്ത്
ഉയിർപ്പാതിയുടലുകൾ
ഒടിഞ്ഞചിറകുകൾക്കുമേൽ
ഒഴുക്കിലുലയുന്ന
കച്ചിക്കുമേലെന്നപോൽ
തള്ളിയകറ്റുന്ന തിരകളായി...
അടുക്കാൻ വെമ്പുന്ന തുടിപ്പുകളെ
പെറുക്കിയെടുത്ത്
ദൂരങ്ങളിലേക്കെറിയുമ്പോൾ....
പക്ഷേയെന്ന്
ഒരു പൂർണ്ണവിരാമത്തിലേക്കുള്ള
നീട്ടിയെറിയൽപ്പോലെ
അതിവേഗം
കുഞ്ഞൊഴുക്കുകൾക്കുള്ള
ദ്വാരങ്ങളടക്കാനോങ്ങുന്ന
പശയരക്കായി
അവിടവിടെയേതാനും തുളകൾ
വ്യാധി പടർന്ന്
തമോരന്ധ്രങ്ങളായി
ഒരു ഭീമൻചുഴലിയിൽ
ചുഴിക്കകമൊരുമിക്കും നേരം
മറ്റൊരു വെട്ടത്തിലേക്ക്
ഒന്നിച്ചൊരു ജനക്കൂട്ടത്തിന്റെ
പുലർമിഴി ചിമ്മിത്തുറക്കും മുമ്പ്
പുച്ഛത്തിന്റെ പുകമറ
അവിടം മുഴുവൻ
കാറിത്തുപ്പുന്ന
പക്ഷിക്കൂവലുകളായി
വീണ്ടും സടകുടയുന്നു
പക്ഷേ.... എന്നു നീട്ടിയൊരു
കൊക്കരക്കോ.
Comments
Post a Comment