നിന്നിൽ നിന്നുമെന്നിലേക്ക്

 --- ഗീത മുന്നൂർക്കോട് ---

നിൻ നീലദംശനമേറ്റതിൽ നിന്നും

സജലമിണമിഴി  വരച്ചെടുക്കട്ടെ

വിശാരദം നിന്നെ മുകർന്നിട്ട് ഞാൻ

ഹൃദയമെത്ത വിരുത്തി നീർത്തട്ടെ

നിന്റെ ദൂരങ്ങളെന്നിലാഴ്ത്തട്ടെ, വേഗ-

മളന്നിട്ട് ഭാവിചക്രമുരുട്ടിയോടട്ടെ

പിൻനടത്തേണ്ടും വഴിപ്പടർപ്പിനെ

കുതറി മാറി ഞാൻ വഴിയകറ്റട്ടെ

നിന്റെയാഴങ്ങളിൽ മുങ്ങിപ്പെറുക്കിയ

അഭൌമസത്യത്തെ നുകർന്നിടട്ടെ

സർവ്വംസഹയായ് സഹനപർവ്വത്തെ

ആഴക്കടലിന്റെ കാണിക്കയാക്കട്ടെ

തപിക്കും വികാരവെയിലിൻ ചൂടിൽ

സ്വത്വത്തെത്തന്നെ വരഞ്ഞിടട്ടെ.

നിന്നിൽ നിന്നുമെന്നിലേക്ക് ഞാൻ

തിരിഞ്ഞ് നോക്കട്ടെ, മതിവരുവോളം