മുളയേണിയേന്തുന്ന ജീവനസ്വപ്നം
****************************************
തോളിലേറ്റിയ മുളയേണി
- നിന്നെയിവൻ ചുമക്കുമെന്നൊരശരീരിയുള്ളിൽ
ചൂണ്ടുന്നു, ചുമടേയല്ലയിന്നീ മുളയേണി –
ആകാശംമുട്ടെ നെടുകെയിവനെ
കുത്തിനിർത്തണം,
ഉയരങ്ങളുടെ തുടർച്ചയ്ക്കായൊന്നു
നെഞ്ചോടേറ്റുകൊണ്ട് .
പിൻമുറക്കാരനുണ്ടനുഗമിക്കുന്നു
അവൻ ചവിട്ടേണ്ടുന്ന ഉയരങ്ങളോ
മുൻനടക്കുന്നു ...!
മനസ്സിലാണ് ഭാരം!
കഞ്ഞിക്കാശിനു വകയിരിപ്പായി
മോഹമധുരമൂറുന്ന തേൻകനികൾ
സ്വപ്നക്കനിവുകളുൾനീരായ്ത്തുളുമ്പുന്ന
ഇളനീർക്കുടങ്ങൾ
അറുത്തു വീഴ്ത്താനെത്രയോ !
പൊന്മുത്തുകൾ നുള്ളാനുണ്ട്
നാളേയ്ക്കുള്ള എരിവുമണികൾ
അരിയവല്ലികളൊടിയാതെയവരറിയാതെ
വേണമൊരു കാവലാൾ
മുളയേണിയിതുയർച്ച താങ്ങാൻ !
കൊത്തിയടുക്കാനുമുണ്ടല്ലോ ,
തണൽപ്പുറങ്ങൾക്കുള്ള മേച്ചിൽവട്ടങ്ങൾ;
ഓലപ്പെരുംഞാത്തുകൾ ..
വെട്ടിയിട്ടു മുട്ടിക്കീറാൻ
കഷ്ടപ്പാടുകളുടെ വിറകിൻമുട്ടികൾ
ഒടിച്ചിടാനേറെ സങ്കടച്ചില്ലകൾ...
ജീവിതച്ചുമലിൽ ഭാരമുണ്ടെങ്കിലും
വഴികൾ നീണ്ടുവരുന്നുണ്ട്
പേശികളിൽ ഉരുക്കുവിശ്വാസമുണ്ട്
നടത്തയുടെ കനങ്ങൾക്ക്
ലാഘവാർത്ഥങ്ങൾ വരുന്നുമുണ്ട്.. !
Comments
Post a Comment